Uko Ikora

 

Inshingano z'ibanze

 

 

 

Inshingano y'ibanze y’Inteko Ishinga Amategeko ni ugushyiraho amategeko no kumenya no kugenzura ibikorwa n’imikorere bya Guverinoma mu izina ry’abanyarwanda  hagamijwe iterambere ry’Igihugu

 

Uburyo Umutwe w'Abadepite ukora

 

 

 

Umutwe w’Abadepite ni urwego rwishyiriweho n’abaturage kugira ngo baruhagararire, Abadepite barugize baba baratowe n’abaturage.

Umutwe  w’Abadepite ufite inshingano z’ingenzi :
-    Gushyiraho amategeko;
-    Kumenya no kugenzura ibikorwa n’imikorere bya Guverinoma;
-    Guhagararira abaturage.

Kugirango Umutwe w’Abadepite ugere ku nshingano zawo, washyizeho inzego  ukoreramo :

-    Inteko  rusange ( arirwo rwego rukuru)
-    Biro
-    Amakomisiyo
-    Inama y’Abaperezida

Imirimo y’Inteko rusange  ibera mu ruhame, ubishatse wese   yemerewe  gukurikirana imirimo y’inama  ariko ntiyemerewe  gufata ijambo, kuko aba ari igihe cyo gufata ibyemezo, ibitekerezo bitangirwa muri Komisiyo. Igihe hari  umuturage ufite ikibazo, akigeza ku Mudepite abimubwiye mu magambo cyangwa yandikiye Perezida w’Umutwe w’Abadepite. Umutwe w’Abadepite wateganije iminota 30, buri gihe mbere y’uko inama itangira, wo kumva ibibazo abaturage bagejeje ku Badepite. Ibyo bibazo  bisuzumwa na Komisiyo y’Ibibazo by’Abaturage.

Imirimo y’Inteko rusange itangira buri gihe saa cyenda z’amanywa (15h00) ikarangira saa kumi n’ebyiri z’umugoroba (18h00).
Imirimo muri Komisiyo itangira buri gihe saa tatu za mugitondo (09h00) ikarangira saa sita z’amanywa (12h00).

Imirimo y’Amakomisiyo nayo ibera mu ruhame, ariko abakurikiranye imirimo y’inama  ntibemerewe  gufata ijambo, hari ubwo Komisiyo ishobora gutegura inama zihariye ku mushinga w’itegeko abaturage n’abanyamakuru bashobora guhabwamo ijambo.